Joe Hart asaini mkataba mpya.

Na Chikoti Cico

Kipa namba moja wa Manchester City na timu ya taifa ya Uingereza Joe Hart amesaini mkataba mpya na timu hiyo toka jiji la Manchester, mkataba utakaomuweka klabuni hapo mpaka msimu wa mwaka 2018-2019.

Hart ambaye ameshaichezea City ambao ni mabingwa watetezi wa ligi kuu nchini Uingereza michezo 276 toka aliposajiliwa kutoka timu ya Shrewsbury Town mwaka 2006 atapokea mshahara wa kiasi cha pauni 120,000 kwa wiki kwenye mkataba huo mpya.

Akiongea na mtandao wa Manchester City baada ya kusaini mkataba huo mpya Hart alisema “ Hakika nina furaha, nimekuwa hapa kwa muda mrefu sasa nataka hilo liendelee, mkataba mpya unamaanisha nitakaa muda mrefu, klabu inafanya mambo ya kustaajabisha kwa muda huu, tumetengeneza historia na tunataka kuendelea kufanya hivyo”.

Aliendelea kusema “kutaka kukaa hapa kamwe halikuwa jambo kwangu, nimependa kila muda tangu nimejiunga, klabu inakua na nimekuwa na bahati kuwa sehemu ya msafara, nataka kuendelea kushinda na timu na kuzidi kukua.

Vijana wengi wamesaini mikataba ya muda mrefu hivyo tunajengeka kama kikosi na nafikiri kuna wachache wetu ambao tumekuwa hapa kwa muda mrefu sasa”

Mwisho Joe Hart alisema “tunafurahia kujenga ari ya ushindi, jinsi klabu inavyokuwa kati yetu na jinsi tunavyohitaji kukua sambamba nayo”