Simba vs Ruvu Shooting-Uwanja wa Taifa Dar es Salaam

Na Oscar Oscar Jr

Timu ya Simba inajiandaa kushuka dimbani siku ya Jumapili wakiwa na hamu ya kupata ushindi kwa mara ya kwanza, baada ya kucheza mechi sita na kutoka sare michezo yote. Simba inashika nafasi ya 10 huku ikiwa na mabao sita ya kufungwa na kufunga.

Simba imeendelea kuathirika kisaikolojia baada ya wao kutangulia kupata goli la kuongoza kwenye kila mchezo lakini, wapinzani wao wamekuwa wakitoka nyuma na kusawazisha. 

Ruvu Shooting walianza ligi kwa kusua sua baada ya kufungwa na Tanzania Prisons wakiwa nyumbani kabla ya kupokea tena kichapo kutoka kwa Azam fc.

Ruvu Shooting walizinduka kwenye mechi yao ya nne pale walipowafunga Ndanda bao 3-1 na kisha kushinda bao 1-0 dhidi ya timu ya Polis Morogoro. Ruvu kwa sasa wanashika nafasi ya nane huku wakiwa na pointi saba.

Viungo wa Simba, Amri Kiemba, Haruna Chanongo na Shabani Kisiga, wataukosa mchezo huo kufuatia kusimamishwa na Uongozi kutokana na kinachodaiwa kuwa ni utovu wa nidhamu na hujuma kwa timu hiyo. Kisiga na Emmanuel Okwi ndiyo wfungaji bora wa timu hiyo kila mmoja akiwa na mabao mawili mpaka sasa.

Baada ya kufanya vizuri dhidi ya timu za Ndanda na Polis Morogoro, Shooting walijikuta katika wakati mgumu pale walipofungwa na Coastal Union wiki iliyopita kwa bao 1-0 kwenye dimba la Mkwakwani Jijini Tanga. 

Mchezo huo hapo awali ulitangazwa kuwa wa mwisho kwa kocha wa Simba, Patrick Phiri kama hatopata matokeo ya ushindi kwa hiyo ni wazi kuwa, utakuwa na ushindani kwa pande zote mbili.