Ozil mpaka mwaka 2015

 Na Oscar Oscar Jr

Kiungo mshambuliaji wa Arsenal Mesut Ozil ameibuka na kusema kuwa, ana imani kubwa na kocha wake Arsene Wenger kuwa anamtengeneza na kumfanya kuwa bora zaidi. 

Ozil alinunuliwa kwa rekodi ya uhamisho kwa timu hiyo uliogharimu Pauni 42.5M na sasa anajiandaa kurudi dimbani mwanzoni mwa mwaka 2015.

Ozil ambaye alishinda kombe la Dunia mwaka huu nchini Brazil, amekuwa akilalamikia tangu alipojiunga na timu hiyo kutokana na kucheza mara nyingi chini ya kiwango na kupelekea watu wengine kudhani kuwa pengine ligi hiyo inamzidi nguvu.

Kumekuwa pia na taarifa kuwa huenda mchezaji huyo anaweza kuihama klabu hiyo dirisha la usajili litakapofunguliwa huku klabu za Bayern Munich na Manchester City, zikitajwa kumuhitaji lakini mwenye amesema, yuko kwenye klabu sahihi na anaishi kwa furaha.

Mara kadhaa pia kocha wa Arsene Wenger amekuwa akinukuliwa kuwa, anajua Ozil anachokitaka na kuna uwezekano mkubwa kwa mchezaji huyo kurejea kwenye kiwango cha juu pengine kuliko hata alivyokuwa. 

Ozil ameendelea kusema kuwa, hababishwi na vyombo vya habari vinavyohoji uwezo wake kwani mchezaji anaweza leo kucheza vizuri sana lakini, kesho akacheza vibaya kwa hiyo hali hiyo ni ya kawaida kabisa katika soka.


Arsenal Jumamosi hii watakuwa nyumbani kawaalika Manchester United kwenye dimba la Emirates majira ya saa 2:30 Usiku na matokeo ya ushindi kwa Gunners, yanaweza kufufua matumaini ya kupigania ubingwa huku ushindi kwa Man United, utaweza kuwafanya vijana wa Loius Van Gaal, kufufua matumaini ya kumaliza kwenye moja ya nafasi nne za juu.