Mwambusi akubali kubaki Mbeya City

UONGOZI wa Halmashauri ya Mbeya, umembakiza kocha wa Mbeya City, Juma Mwambusi katika ajira yake baada ya kufikia makubaliano katika vikao vyao vilivyokuwa vikifanyika kwa wiki nzima.

Mwambusi aliandika barua ya kujiuzulu kufundisha timu hiyo ambayo imefanya vibaya katika mechi zake saba na kushika nafasi ya mwisho kwenye msimamo wa Ligi Kuu Bara ikiwa na pointi tano pekee ikifungwa mechi nne mfululizo, ikishinda moja na kutoka sare mechi mbili.

Habari kutoka ndani ya klabu hiyo, zilisema kwamba tayari Mwambusi amekubali kuendelea kuifundisha timu hiyo ambayo msimu uliopita ilishika nafasi ya tatu kwenye msimamo wa Ligi Kuu Bara na kuacha gumzo katika ligi hiyo.

“Mwambusi amekubaliana na viongozi wake kuendelea kuifundisha timu, kwa kipindi hiki isingekuwa rahisi kupata kocha mwingine kwani ni mapumziko ya muda mfupi, hivyo wamemwomba aendelee na ajira yake ikiwemo kurekebisha baadhi ya mambo ambayo kocha huyo ametaka yafanyike,” kilisema chanzo hicho.

Akitoa ufafanuzi huo, Katibu Mkuu wa Mbeya City, Emmanuel Kimbe alisema: “Mwambusi ni kocha wetu na ni mfanyakazi wetu lakini kila kitu kitajulikana zaidi kesho (leo) Jumatatu, kwani kwa sasa siwezi kuzungumza zaidi juu ya hilo mpaka kesho.”

Hivi karibuni Mwambusi alibwaga manyanga kwa madai kuwa anatuhumiwa kuwa ni mkali kwa wachezaji wake na hana mbinu mpya, hivyo akaamua kuacha kazi ili wengine.

Source: Gazeti la Mwanaspoti la leo