Barcelona yaendelea kuimarika huku Messi akiweka rekodi.

Hatimaye Mshambuliaji wa kimataifa wa Argentina na klabu ya Barcelona, Lionel Messi amevunja na kuandika rekodi mpya kwenye ligi kuu nchini Hispania maarufu kama La Liga, baada ya hapo jana kufunga magoli matatu (Hat-Trick) kwenye mchezo ambao ulimalizika kwa Barcelona kuibuka na ushindi wa magoli 5-1 dhidi ya Sevilla.

Magoli hayo matatu ya jana yanamfanya mshambuliaji huyo ambaye amewahi kushinda tuzo ya mchezaji bora Duniani mara nne, kutimiza jumla ya magoli 253 kutokana na kucheza michezo 289. 

Rekodi hiyo ya aina yake hapo awali ilikuwa inashikiliwa na mchezaji wa zamani wa klabu ya Athletico Bilbao, Telmo  Zarra ambaye alifunga magoli 251 kwenye michezo 277.

Wachezaji wengine wenye heshima yao katika kutikisa nyavu ligi kuu ya Hispania ni pamoja na mchezaji wa zamani wa Real Madrid, Hugo Sanchez ambaye alifunga magoli 234 kwenye mechi 347, Raul Gonzalez akiwa na Real Madrid alifunga magoli 228 kwenye mechi 550 na Afredo Di Stefano ambaye alifunga 227 kwenye mechi 329.

Ushindi huo wa jana umewarejesha Barcelona katika nafasi ya pili wakiwa na alama 28 kwenye msimamo wa ligi kuu nchini Hispania baada ya Real Madrid nao kuibuka na ushindi wa mabao 4-0 dhidi ya Eibar na kutimiza pointi 30 huku, Athletico Madrid wakitimiza pointi 26 na kushika nafasi ya tatu.