Manchester United yawakata maini mashabiki wake.

Na Oscar Oscar Jr

Hatimaye  makamu Mwenyekiti wa klabu ya Manchesetr United, Ed Woodward  ameibuka na kuwakata maini mashabiki wa klabu hiyo kwa kubainisha kuwa, Uongozi pamoja na benchi la ufundi la timu hiyo hawana mpango wa kutumia fedha kwenye dirisha dogo la usajili ambalo litafunguliwa mwezi January.

Ed Woodward amesema kuwa, kocha wa timu hiyo Loius Van Gaal anatakiwa kutumia kikosi alichonacho kuhakikisha timu inarudi kwenye michuano ya klabu bingwa Ulaya huku usajili mkubwa wakijipanga kufanya baada ya msimu huu kumalizika.

Manchester United tayari wamejipanga kuanza na beki wa Borussian Dortmund, Mats Hummels ambaye amekuwa akihusishwa na kutaka kujiunga na klabu ya Arsenal. Ed Woodward tayari amesema kitita cha fedha cha Pauni 47M kimetengwa kwa ajili ya beki huyo.

Hii ni habari mbaya kwa mashabiki wa klabu hiyo hasa ukizingatia kuwa, klabu hiyo inakabiliwa kwa sasa na tatizo la marejeruhi wengi wa kikosi cha kwanza. 

Mtazamo wa wengi ilikuwa ni kuona timu hiyo ikiboresha safu ya ulinzi na kiungo ili kuleta ushindani lakini, habari ya makamu Mwenyekiti huyo imekuja kuwakata maini wale waliotarajia makubwa kwenye dirisha dogo.

Manchester United kwa sasa ipo kwenye nfasi ya saba kwenye msimamo wa ligi kuu huku wikendi hii wakijiandaa kushuka dimba Emirates kumenyana na timu ya Arsenal. 

Mchezo huu unatarajiwa kuvuta hisia za mashabiki wengi hasa ikizingatiwa kuwa, Arsenal kwa misimu ya hivi karibuni wameshindwa kutamba mbele ya Man United.