Beki wa Kifaransa mbadala wa John Terry

 Na Oscar Oscar Jr

Pamoja na kuongoza ligi huku wakionekana kukamilika kwenye kila idara, klabu ya Chelsea imejipanga kuhakikisha kwamba inaongeza nguvu kwenye kikosi cha kocha Jose Mourinho. 

Beki wa kifaransa na klabu ya Real Madrid, Raphael Varane ametajwa na magazeti ya Ulaya kutakiwa na Chelsea kama mbadala wa mkongwe na nahodha wa timu hiyo, John Terry.

Huku timu ikionekana kuimarika zaidi kupitia uwepo wa Nemanja Matic, chelsea wamejipanga kumuongezea mkataba mpya kiungo huyo huku kukiwa na dalili za kuongezewa msaidia katika nafasi anayocheza. 

Kiungo wa kimataifa wa Ujerumani na klabu ya Real Madrid, Semi Khedira amekuwa akitajwa kujiunga na klabu nyingi za EPL zikiwamo Arsenal na Manchester United lakini, taarifa za leo zinadai kuwa anaweza kujiunga na kocha wake wa zamani, Jose Mourinho.

Baada ya taarifa za winga wa kimataifa wa Ujerumani na klabu ya Chelsea, Andre Schurrle kuwaniwa na Liverpool kupamba moto, Chelsea wanajiandaa kuziba nafasi yake kwa kumdondosha winga fundi kutoka klabu ya Borussia Dortmund, Mjerumani Marco Reus.

Chelsea wanaongoza ligi kuu ya Uingereza kwa sasa wakiwa na alama 29 baada ya mechi 11 huku wakiwa hawajapoteza mchezo hata mmoja na wikendi hii, watawakaribisha West Brom majira ya saa 12:00 Jioni siku ya Jumamosi kwenye dimba la Stanfford Bridge.