Mjerumani sasa kutuwa Liverpool

Na Oscar Oscar Jr

Baada ya kuanza ligi kwa kusua sua, timu ya Liverpool sasa wanataka kuongeza nguvu kwenye kikosi chao kwa kumchukuwa mshambuliaji wa kimataifa wa Ujerumani na klabu ya Chelsea, Andre Schurrle. 

Wikend hii timu hiyo inayokamata nafasi ya 11 itajimwaga dimbani kucheza dhidi ya Crystal Palace ambao wanaonekana kuchechemea msimu huu wakikamata nafasi ya 18 kwenye ligi.

Kocha Brendan Rodgers sasa ameamua kutenga kitita cha Pauni 25M kuhakikisha anamnasa Schurrle ambaye pamoja na kuonyesha kiwango kizuri, bado hana namba ya uhakika kwenye kikosi cha Chelsea ambacho kinaongoza msimamo wa ligi kuu mpaka sasa wakiwa na pointi 29 chini ya kocha Jose Mourinho.

Liverpool watapata upinzani pia kutoka klabu ya Tottenham Hotspurs ambao nao wanaonekana kumuwania mchezaji huyo ambaye alishinda kombe la Dunia nchini Brazil akiwa na timu ya taifa ya Ujerumani. 

Schurrle alijiunga na Chelsea kwa Pauni 18M na tayari amefunga magoli 11 kutokana na mechi 54 ambazo ameitumikia Chelsea huku mara nyingi akiingia kutokea benchi.

Liverpool wanalazimika kuongeza nguvu kwenye kikosi chao hasa ukizingatia, Daniel Sturridge ameumia kwa mara nyingine akiwa anakaribia kupona huku Mario Balotelli, naye akiumia wakati alipokuwa na timu yake ya taifa ya Italia.