Steven Gerrard aichimba mkwara Real Madrid.

Na Oscar Oscar Jr

+255789-784858

Nahodha wa Liverpool, Steven Gerrard ameibuka na kusema kuwa, timu yao inauwezo wa kuishangaza Real Madrid usiku wa leo pale timu hizo zitakapokutana kwenye mchezo wa Uefa kwenye dimba la Anfield. 

Gerrard amedai cha msingi ni kusahau kiwango kibovu walichoonyesha kwenye mchezo wao dhidi ya QPR na kurejea kwenye ubora wao wa siku zote.

"Kila mtu ndani ya chumba cha kubadilishia nguo, anajua uzito wa mchezo huo kuanzia wachezaji 11 watakaoanza leo hadi wale watakaoanzia benchi. Kila mmoja wetu anafahamu ubora wa Real Madrid na tumejipanga kwa hilo" Alisema Gerrard.

Gerrard alifunga magoli mawili mara ya mwisho timu hizo zilipokutana ambapo Liverpool iliibuka na ushindi wa magoli 4-0 kwenye dimba la Anfield. Pamoja na hayo, Steven amekiri kuwa zama zimebadilika na kwa sasa, Real Madrid ndiyo timu bora Ulaya. 

Aina ya wachezaji walionao Real Madrid kwa sasa na uwezo wao dimbani, Liverpool hawapewi nafasi kubwa ya kushinda mchezo wa leo licha ya kuwa historia iko upande wao. 

Gerrard ameendelea kusisitiza kuwa, wanapokuwa Anfield mazingira siku zote yanawafanya wawe kwenye nafasi nzuri ya kupata ushindi.

"Christiano Ronaldo alikuwa bora pale alipokuwa Uingereza na Manchester United lakini kwa sasa, amepiga hatua kubwa mbele.

Ni moja ya wachezaji bra kwa sasa Duniani. Pamoja na kuwa watamkosa Gareth Bale leo, bado Real Madrid wanawachezaji wengi bora" Aliongoza Gerrard