Carragher amuweka Balotelli benchi.

Na Chikoti Cico.

Kuelekea kwenye mechi ya ligi ya mabingwa Ulaya kati ya Liverpool dhidi ya Real Madrid, beki wa zamani wa Liverpool Jamie Carragher ambaye kwasasa ni mchambuzi wa soka anatamani kuona mshambuliaji wa Liverpool Mario Balotelli akianzia benchi na Raheem Sterling kucheza namba yake.

Carragher alisema hayo wakati akizungumza kwenye kipindi cha “Monday Night Football” kinachorushwa na Sky Sport .

Balotelli aliyesajiliwa na Liverpool toka AC Milan kwa ada ya paundi milioni 16 mpaka sasa amefunga goli moja tu kati ya mechi tisa alizoichezea Liverpool hivyo Carragher anaamini Balotelli hatakuwa na msaada mkubwa dhidi ya Madrid.

Hasa ikizingatiwa kuwa Liverpool inashika nafasi ya tatu kwenye msimamo wa kundi B baada ya kufungwa na Basel wiki tatu zilizopita hivyo wanahitaji kupata matokeo mazuri ili kujiweka vizuri kwenye mbio za kuvuka hatua hii ya makundi.

Akiongea ndani ya studio za Sky Sport Carragher alisema “ Balotelli hakimbii vya kutosha, dhidi ya Real Madrid lazima uwafanye mashabiki washangilie.  

Unahitaji kurejea kwa Liverpool ya mwaka jana na walivyokuwa wanashambulia lazima kuwepo na juhudi ya Liverpool ambayo hatujaiona, tumeiona mara moja msimu huu dhidi ya Spurs”

Jamie Carragher aliyekuwepo kwenye kikosi ch Liverpool kilichonyakua kombe la ligi ya mabingwa wa Ulaya mwaka 2005 mbele ya AC Milan kabla hajastaafu kucheza soka.

 Carragher aliendelea kusema “Nitamweka Raheem Sterling pale mbele kwasababu anaweza kukimbia nyuma ya mabeki na Liverpool watatakiwa kuwa na mchezo mwingi wa mashambulizi ya kushitukiza”