West Ham United yatoa kocha na mchezaji bora Octoba.

Na Oscar Oscar Jr

Hatimaye kocha wa timu ya West Ham United, Sam Allardyce ameibuka kocha bora wa mwezi Octoba baada ya kuiongoza timu hiyo kuifunga bao 2-0 QPR mwanzoni mwa mwezi uliopita kabla ya kushinda dhidi ya Burnley na Manchester City.

Kwa upande wapili, mshambuliaji wa timu hiyo, Diafra Sakho ambaye amefunga magoli matatu ndani ya mwezi Oktoba amefanikiwa kuibuka mchezaji bora wa mwezi uliopita na kuwaangusha washambuliaji wengine akiwemo mfungaji bora wa ligi kuu mpaka sasa, Sergio Kun Aguero ambaye amefikisha magoli 10.

West Ham United wanashika nafasi ya tano kwenye msimamo wa ligi kuu ya Uingereza wakiwa wameshinda mechi tano, sare mbili na kupoteza michezo mitatu. Diafra Sakho anashika nafasi ya tano katika orodha ya wafungaji bora wa EPL mpaka sasa akiwa na magoli sita.

Siku ya Jumamosi, West Ham United watakuwa nyumbani pale Bleyn kucheza na timu ya Aston Villa ambao wanashika nafasi ya 16 wakiwa na pointi 10, mchezo huo utapigwa majira ya saa 12:00 Jioni.