AZAM FC

                                                         

BENCHI la Ufundi la Azam FC limetamka kuwa halitafanya usajili wowote wa mchezaji mpya kwa ajili ya msimu ujao, badala yake litaanza programu ya kupandisha vijana  kwenye timu hiyo kupata uzoefu.

Kocha msaidizi wa timu hiyo, Kally Ongala aliliambia Mwanaspoti juzi Alhamisi jijini Dar es Salaam kuwa umefika wakati wa kuvuna kile walichokipanda.

“Hatuna matarajio ya kuongeza mchezaji mpya kwenye usajili ujao. Badala yake tutaanzisha utaratibu wa kuwapandisha vijana kutoka kwenye taasisi yetu, waweze kuonyesha uwezo wao na kukomaa kimashindano.”

Kally alisena kuwa kuna baadhi ya wachezaji ambao tayari walishawapandisha kwa lengo la kupata uzoefu kama kipa ambaye ameitwa na Kocha Kim Poulsen kwenye timu ya Taifa Stars, Aishi Manula.

“Nafikiri umefika wakati muafaka wa kuwapandishwa wengine na kuonyesha kile ambacho walikuwa wakijifunza tangu mwanzo na kuisadia timu yao,” alisema Kally mchezaji wa zamani wa Yanga na Kajumulo na Azam kabla ya kujikita katika kazi ya ukocha.

Alisema wanakiamini kikosi chao kuwa ni bora na ndiyo maana wamepanga kutosajili mchezaji yeyote mpya katika dirisha la uhamisho wa wachezaji litakapofunguliwa rasmi.

“Tulichokifanya ni kuboresha mikataba ya wachezaji wetu iliyokuwa ikikaribia kumalizika na wale ambao walikuwa wakicheza kwa mkopo kuwapa mikataba,” aliongeza.

Aliongeza kuwa wanaamini wana kikosi imara ambacho kinaweza kukabiliana na timu yoyote na pia kufanya vizuri katika mashindano ya Kombe la CAF mwakani na Ligi Kuu Tanzania Bara.

Pia, alisema kuna baadhi ya wachezaji watatolewa kwa mkopo kama ilivyokuwa kwa Mrisho Ngassa ingawa alikataa kuweka majina yao hadharani.

Imefahamika kwa wachezaji Uhuru Suleiman aliyekuwa akicheza kwa mkopo pamoja na kipa Deogratius Munishi . aliyesimamishwa kwa tuhuma za kupokea rushwa wameachwa wakati Gaudence Mwaikimba na Malika Ndeule wakitarajia kwenda kwa mkopo Ashanti United iliyorejea Ligi Kuu Bara.