Isco kumuweka benchi Gareth Bale?

Na Oscar Oscar Jr

Baada ya Real Madrid kucheza vizuri kwenye mchezo wa Uefa dhidi ya Liverpool na ule wa La Liga dhidi ya Barcelona na kushinda mechi hizo bila kuwepo mshambuliaji wa zamani wa Tottenham Hotspurs Gareth Bale, maswali mengi yameibuka kufuatia ubora ulioonyesha Isco aliyechukuwa nafasi yake.

Tayari vyombo vya habari nchini Hispania, vimeripoti kuwa Gareth Bale hana nafasi tena ya kuanza kwenye kikosi hico cha kocha Carlo Ancelotti na nafasi yake imechukuliwa na Isco. 

Kocha wa Real Madrid amekutana na swali hilo wakati akizungumza na wanahabari kuelekea mchezo wao dhidi ya timu ya Grananda utaopigwa siku ya Jumapili.

Ancelotti amesema kuwa, pamoja na uwezo mkubwa ulioonyeshwa na Isco kwenye ushinda wa 3-1 dhidi ya Liverpool na ule wa 3-1 dhidi ya Barcelona, bado Bale ni mchezaji muhimu wa Real Madrid na haoni kama amepoteza nafasi yake kwenye kikosi cha kwanza.

Ancelotti amesisitiza kuwa, goli moja alililofunga mshambuliaji huyo raia wa Wales kwenye fainali ya kombe la Mfalme msimu uliopita na goli lingine kwenye fainali ya Uefa, yanathibitisha ubora wake ndani ya kikosi chake. 

Gareth Bale tayari ameshafunga magoli manne ya La Liga mpaka sasa sawa na Karime Benzema, huku kukiwa na taarifa za kurejea kwake kwenye kikosi cha kwanza muda wowote.

Christiano Ronaldo na Sergio Ramos, walipumzishwa kwenye mchezo wa kombe la Mfalme ambapo, Real Madrid walishinda mabao 4-1 dhidi ya Cornella.

Kocha huyo amesisitiza kuwa, wachezaji hao atawatumia kwenye mchezo wao wa siku ya Jumapili dhidi ya timu ya Granada ingawa, wanaweza kumkosa kiungo Luke Modric kutokana na kuwa na maumivu.