NIONAVYO MIMI KWA ARJEN ROBEN

by Joachim Sologo

.

Kwa wale waliobakia katika runinga zao au kumbi za mpira watakubaliana na mimi kwamba Arjen Robben alionekana kuwa mwenye furaha nathubutu kusema kuliko wachezaji wote wa Bayern Munich. Akiwa amezaliwa tarehe 23 January mwaka 1984 katika nchi ya Uholanzi, Arjen Robben ni mchezaji mwenye kipaji cha hali ya juu anayemudu vyema nafasi ya winga (kiungo mshambuliaji). Arjen Robben amepitia katika timu tofauti tofauti, alianza kucheza soka lake katika timu ya nyumbani kwao iitwayo Groningen katika msimu wa 1999/2000.

Baada ya kupata umaarufu akiwa na timu hiyo ARjen Robben alinunuliwa na club ya PSV ambayo aliitumikia kabla ya matajiri wa uingereza wenye maskani yao pale darajani Chelsea almaarufu The Blues kumchukua wakati huo wakiwa chini ya kibopa wao Bilionea Abramovich na mwalimu wao  msema ovyo Jose Mourinho. Baada ya kuitumikia Chelsea kwa mafanikio hatimaye Arjen Robben alihamia Real Madrid ambako hakuwa na msimu mzuri sana kutokana na kuandamwa na majeruhi, lakini kwa sababu anayejua anajua tu siku zote fundi huyu Arjen Robben hatimaye alitua katika mikono salama ya wanaume kutoka Ujerumani ambao ni Bayern Munich klabu anayoitumikia hadi sasa.

Kwa nini Robben alifurahi sana jana? Kwangu mimi nimefanya tathmini ya mambo machache ambayo nahisi yalimfanya Robben kufurahia sana ubingwa wa UEFA hapo siku ya jana. Anagalia yafuatayo;

Kabla ya fainali ya jana Arjen Robben alikuwa amepoteza fainali nne za makombe makubwa ndani ya miaka mi 4 hivyo alijiona kama mtu asiye na bahati. Kumbuka kabla ya fainali ya jana Robben alikuwa amepoteza fainali kubwa nne ambazo ni ile ya Kombe la dunia nchini Afrika Kusini dhidi ya Hispania mwaka 2010, fainali mbili za UEFA champions league ambazo ni ile dhidi ya Inter Milan  mwaka 2010 na ile ya mwaka jana 2012 dhi ya Chelsea lakini pia usisahau kwamba akiwa na Bayern alikosa kombe la DFB Pokal katika fainali. 

Robben alikosa mkwaju wa penalt katika fainali ya mwaka jana pale jijini Munich katika uwanja wa Allianz Arena, ilikuwa ni penalt ambayo kama angeifunga katika fainali ile basi Bayern Munich wangeweza kutawazwa mabingwa mwaka jana mbele ya Chelsea. Hiyo ilimfanya kukosa raha na kujiona mnyonge mbele ya mashabiji wa timu yake hiyo.

Katika mchezo wa jana tayari alikuwa ameshakosa nafasi tatu muhimu, hivyo ni wazi kwamba kama Bayern Munich wasingetwaa ubingwa hapo jana basi Arjen Robben angepaswa kubebeshwa lawama maana alipata nafasi muhimu lakini hakuwa makini katika kuzitumia.

Kutwaa ubingwa wa ulaya kwa mara ya kwanza, kombe la jana ndilo lilokuwa la kwanza kwa Arjen Robben katika ngazi ya vilabu barani ulaya. Hivyo ilikuwa usiku wa pekee katika maisha yake ya soka.

Huyu ndiye Arjen Robben, shujaa wa Bayen Munich katika fainali ya UEFA champions League iliyopigwa jana pale katika uwanja wa Wembley katika jiji la London ambako shujaa huyu alipata kuishi wakati akiitumikia Chelsea watoto wa darajani. Haya yote yalimfanya kuwa mtu mwenye furaha baada ya filimbi ya mwisho iliyoashiria kuwa BAYERN MUNICH ndiyo mabingwa wapya wa UEFA CHAMPIONS LEAGUE 2012/2013.